“شو ناقصك” عنوان حملة -كما يبدو- تنظمها الهيئة المستقلة للانتخاب، لتشجيع الشباب ممن هم فوق الـ 25 عاماً للترشح للانتخابات البلدية المزمع عقدها في شهر آب القادم.
بصراحة “صفنت” في السؤال: معقولة الهيئة مش عارفة شو ناقص الشباب عشان يترشحوا للانتخابات البلدية؟! معقولة الهيئة مش عارفة حجم البطالة في قطاع الشباب؟! معقولة الهيئة مش منتبهة للفقر المتزايد وتأخر سن الزواج نتيجة الاوضاع الاقتصادية بهمة حكوماتنا المتعاقبة وسياساتها؟! معقولة الهيئة ما بتعرف عن قانون الانتخاب اللي بيعزز من نفوذ رأس المال وبيحرم اصحاب البرامج الانتخابية من اية فرص حقيقية للفوز في الانتخابات؟! معقولة الهيئة ما سمعت بشراء الاصوات و”طرود الخير”؟! معقولة الهيئة ما سمعت بصندوق البادية الوسطى في الانتخابات البرلمانية اللي مختفي لهسا ؟! معقول الهيئة ما عرفت انه اصلاً ممنوع الشباب وغير الشباب يترشحوا لمنصب امين عمان؟! معقول الهيئة ما عرفت بالقمع والاعتقالات والملاحقات لشباب الحراك ؟! اعتقد انه كان الاولى بالهيئة تسمي حملتها “شو مش ناقصك” او تحط يافطة كبيرة على مراكز الترشح مكتوب عليها : “عزيزي الشاب .. انت من كل عقلك جاي تترشح؟!”.
