لآخر المستجدات تابعنا على قناة تلغرام

تابعنا
مقالات

بتسمعوا بالبنك االدولي؟! / فاخر الدعاس

بتسمعوا بالبنك االدولي؟! هذا البنك اللي حملة ذبحتونا “مقرقعيتكم” فيه، إنه الحكومة بتنفذ إملاءات صندوق النقد والبنك الدوليين..

اتذكرتوا؟! كويس ..

هذا البنك يا جماعة بيصدر تقرير دوري عن الأردن، وبيرفع من خلاله أوامر للحكومة -قصدي توصيات-  حول التعليم في الأردن .. كلام جميل جداً ..

يعني هالبنك بتهمه مصلحتنا كثير ودليل على هيك إنه إلنا أكثر من عشرين سنة بنطبق أوامره -قصدي توصياته- ولله الحمد أموره من سيء إلى أسوأ، وأوشكنا على الإفلاس أفراداً وحكومةً ..

ومن منطلق اهتمامه بمصلحتنا وإنه ما بيخلي كبيرة ولا صغيرة إلا بيتدخل فيها -قصدي بيرفع توصياته حولها-، فالبنك وصل مرحلة يشرحلنا عن التوجيهي ومشاكله وأزمته ..

وطلع مع البنك إنه التوجيهي ما بيصير يكون مرجعية للقبول الجامعي، وإنه “مع مراجعة للغرض المزدوج للشهادة والقبول الجامعي، ومع مراجعة للمعايير والإجراءات التي تستخدمها مؤسسات التعليم الجامعي لاختيار الطلاب”.

هذا الحكي يا جماعة وين سمعته؟! .. وين سمعته يا فاخر؟!!

أيونننننننننننننن .. مقابلة وزير التربية مع قناة الأردن اليوم، لما حكى بدنا نفصل بين انه الواحد ياخذ شهاد توجيهي وبين إنه ينقبل بالجامعة، وإنه لازم يكون في امتحان قبول جامعي..

تمام .. كلام جميل!!

طيب حابب تضيف شي؟؟!! أضيف .. آه بدي أضيف إني أنا كمواطن أردني كثير مبسوط على العلاقة “الرفاقية” بين حكومتنا الأردنية والبنك الدولي، واللي وصلت مرحلة  إنه المدير العام السابق للبنك الدولي في واشنطن وبيروت، صار وزير تربية عنا. #والله_من_وراء_القصد

اظهر المزيد
زر الذهاب إلى الأعلى